لاول مره قصة واقعيه على لسان صاحبها جرئه حب جنون موت وانحراف !!

السلام عليكم

خواتي
هاذي قصه انقلها من لسان بطلها لكم .. بدون زياده او نقصان .. قصه حقيقيه
.. صاحبها راح يتابعها ..طويله .. جريئه ممكن تحسون القشعريره .. الانزعاج
لكن كملوها .. شوفوا الريال شعنده .. شنو بيوصلكم له .. شنو العبره من
القصه .
اكرر انا اسمعه و اصيغ كلامه لكم ..

[size=21]السموحه على البدايه .
[size=21]بدايتها فقط مزعجه تماماً .. حقيقه منحرفه
كرهت نفسي و انا اكتبها
غيرت اسماء ابطالها .. و ما راح اكتب مقدمات مثل باجي القصص .. هالقصه فعلاً غير ..

بارت 1

************
الساعه
3 الفجر ما ينسمع الا صوت عقارب الساعه .. و صوت انفاسه .. حشرجه غريبه
تعود اهو عليها .. حاول انه ينام .. لكن مثل كل ليله أرق .. سهر .. تفكير
.. و النهايه وحده !
يقوم بكل ثقل يسحب ريله بالغصب .. يدخل الحمام و يفتح ماي الشاور الحار و يروح تحت هالماي بملابسه ..
دقايق
يحاول انه يتماسك .. لكن ينهار بالتدريج .. يسند على الطوفه بالأول و
جبهته تلامس الجدار .. يصير لحشرجته صدى .. تسارع انفاسه لين يطيح على
ركبه .. ينزع فانيلته .. دقايق قليله .. يقعد فيها و يلم ركبته على صدره و
يدس راسه بين ركبه .. يهتز لورا و جدام .. توتر على محاولة تسكين آلام
نفسيه و الماي ينزل على جسمه لكن يعجز ان يريحه .. ما يرتاح الا لما تختلط
دموعه بقطرات الماي ..
يبجي
لين يرتاح .. هذي حالته كل ليله .. من متى ؟ اهو بنفسه ما يذكر .. كل الي
يذكره انه يحتاج هالماي .. يستر دموعه تحته .. و يخفي صوته فيه ..
يخلص الشاور .. يطلع .. يجابل المرايه ..
برونزي
.. شعره قصير حيل .. حواجبه مرسومين رسم لكن في شق او مثل ما نقول خط
بحاجبه الايسر .. عيونه بنيه ماهي كبيره ولا هي صغيره لكن رموشه طويله حيل
.. خشمه كبير لكن لايق عليه .. مافيه اعوجاج و لا نتوء و الشفايف كبار
نسبياً ..
طويل .. جتوفه عريضه
حيل .. له مثلثات و رقبه عريضه .. جسم رياضي صدر مقسم و بطن عليه مربعات
.. بس مافيه من الضخامه القبيحه .. جسمه مثالي .. و لكن .. غير الجرح الي
شاق الحاجب ..
في جرح غريب على
صدره .. شكل مو مرتب تحت حلمته اليسرى .. و ظهره المثلث المقلوب نقدر نقول
عنه مشوَه بالكامل و كأنه محروق .. حتى زنوده فيهم نفس الحرق .. آثار
قديمه شوي ..

بعد ما
يجهز نفسه يشيل اللاب كوت الابيض و سماعته باييد و قهوته بييده الثانيه
يركب سيارته بورش كايين 2009 اسود يفتح الراديو على موجة ( في . او . ايه
) الامريكيه يسمع الاخبار ..

يسرح .. امريكا .. عشت فيها سنين 7 سنوات .. احلى 7 سنوات بعمري .. و اقذرها !!
اول سنه كنت صغير .. بطل رياضي و ماراح اذكر اي رياضه لحد يعرفني ..
ابتعثت امريكا و انا خايف من العنصريه .. خايف من ثقافه يدييده علي .. ما
اعرف عنها شي .. لاني اعتقد ان الافلام او الاغاني ما تعكس الواقع تماماً
فمثل العمي الي مضيع عصاته !
و اعاني من الوحده .. صج الربع حواليني .. لكن ما لقيت من يسكن الغربه الي
فيني و الصدر الي يحويني .. اتصل على امي فاطمه لاني من كنت بالديره ماكنت
اعرف بنات و لا لي رفيجه ولا احب .. كان كل همي دراستي .. لين انقبلت
بكلية الطب .. ما عندي الا حرمه وحده بحياتي امي فاطمه و كل شوي .. يماااه
شلون اسوي المجبوس .. شلون اسوي التشريب .. يماااه مشتهي مطبق .. فواتير و
مكالمات طويله و النهايه طبخه اما محروقه او ما تنبلع و ما ياكلها الا انا
و ربعي لين شوي شوي تطورت المهارات ..
كنت اشبك على المنتديات النسائيه افتح ركن المطبخ و ادور وصفات بالصور و
عن طريق هالمواضيع اقدر اقول اني و شباب الدفعه خذينا شهادتين .. شهادة طب
و شهادة شيف !!
السنه الثانيه كانت عاديه و اسهل من الاولى قمنا ندل الاماكن و نعرف شلون نتعامل معاهم ..
السنه الثالثه .. لو بيدي جان رجعت بالزمن .. و حرقت هالسنه بحياتي ..
السنه الثالثه .. حفلة السفاره شفت مريم .. كانت اكبر مني بسنتين و قبلي
بامريكا .. طويله و بقمة الرشاقه .. جذبتني رقبتها الطويله !!
اي والله رقبتها .. احب رقبة المره .. احس انها انوثه .. كل ما طالت الرقبه .. كل ما تولعت فيها ..
شعرها بوي على طويل .. ناعم .. اسوود على لون عيونها .. حنطاويه .. امممم
مريم كانت عاديه .. لكن في شي علقني فيها .. لا انطلاقها و لا جرأتها و لا
انوثتها او اهتمامها بنفسها .. كانت نظراتها !
بالضبط .. نظراتها سحر .. مزيج من كل شي .. تخصبقني عدل .. لها نظرات كانت
توترني فيها ,, احس نفسي اعرق .. اتأتأ .. و اكتشفت بعدين بفضل خبرة الربع
.. انها كانت تتعمد تطالعني جذي .. نظرات اغراء !
اعترف مثل اي شاب محروم .. في سن الزواج .. في البدايه اشتهيتها كأنثى ..
لكنها .. شلون اقول .. ما ادري .. المهم انها صارت هاجس .. شمس ماودي انها
تغيب .. وين ما كانت .. كنت انا !!
او على الاقل مثل ما كنت مفتكر ..
مريم .. الله ياخذج يامريم !! لاحظت اني متعلق فيها .. او مأخوذ فيها ..
فكانت تلعب فيني لعب .. و كل هذا من بعيد لبعيد .. و استمرت حالتنا مثل
القطاوه بس عيون بعيون سنه كامله ! حتى بالعطله لما رجعت الكويت .. كان كل
تفكيري فيها .. صاين نفسي علشانها !! خاش قلبي و الحب الي فيه لها و اهي
ما تدري و يمكن تدري بس تحب ترقصني !!
كنت احسب الايام بلا اي مبالغه ابي اليوم الي اسافر فيه .. مو بس علشان
اشوف حبيبتي لأ و علشان افتك من حنة الوالده .. ذبحتني من وصلت لين خلصت
الاجازه .. املج تزوج اخذ حرمتك معاك .. تصونك و تحفظك عن الحرام و تغسل
لك و تنظف و تطبخ و تلمك !
صج كلامها منطقي لكن شلون اتزوج و انا للحين عمري واحد و عشرين و بدون
وظيفه و بعدين اذا انا مو متأقلم مع حياتي هناك شلون على بنت الناس و
ياليت دراستي خفبفه .. هاذي طب مو غشمره كله بالجامعه و بالمكتبه و مشرحه
يعني حرام اظلم زوجتي معاي ..

وصل
اليوم الموعود .. اقول يارب ما تكون رجعت الكويت و تزوجت .. و ما ريحني من
نفسي الا لما غلبني النوم و رحت .. حلمت فيها بعد ما طرنا من لندن حلمت
انها .. تطالعني تبتسم قالت لي .. بالحلم طبعاً انا مثل ما انا ناطرتك
حبيبي مدت ايدها و حطتها على جتفي .. قعدت ولا هاذي اييد المضيف يقعدني من
النوم .. وصلنا !
ادرس
طب و مزروع بالديكور و التصميم .. ابي اشوفها .. جم يوم ما بينت .. و لما
لقيتها .. ابتسمت لها .. خزتني مثل الي وده يشتري شغله يعاينها من فوق
لتحت .. بين عليها الرضا و ردت لي الابتسامه و اكتشفت انها ما سافرت و
الصيف كله كانت هناك ..
الربع
كنت معاهم على اتصال بالديره لكن هناك محد يقولك عنها .. الأنثى الي
بحياته توأم روحه .. اكتشفت انهم لما يشتاقون يصيرون مثل الكتاب المفتوح
كل واحد يسمعني من حبه المكتوب !!
و الغريب ان كل واحد رجع مرتبط بطريقه او ثانيه الا انا !
لاني
اساسا رحت مرتبط .. و لو من طرف واحد .. كان القلب و الفكر مع مريم .. ما
استحيت و قلت لهم مثل ما قالوا لي .. لكن ردة فعلهم كانت غير عن ردة فعلي
..
" اعوذ بالله مالقيت الا هاذي تحبها !
" لا اكيد نصور يتغشمر ما يسويها ..
" انت من صجك ؟
" وخر عنها مو صاحيه
" راعية مشاكل ..
تضايقت
و لكن خذيت فكره عنها .. و الي ساند هالفكره مظهرها الجريء .. ملابس عاريه
.. مرات تطلع بلون شعر غريب .. بنفسجي .. وردي و كل هذا ما وقفني .. او
غير رايي .. حطيت لها الف عذر و كل تصرف كان مثل العسل على قلبي و المشكله
كل تصرفاتها غلط ..
تطورت
علاقة العيون بيني و بينها كانت تتعمد تخليني اغار عليها .. تستمتع لما
تشوفني اتضايق .. صارت تتكلم مع هذا و تضحك مع هذاك باسم الزماله و انا من
داخلي اغلي و اشوفها الحيوانه تشوفني و تضحك .. ضحكه صفرا كانت تحس اني
اعتبرها شي من ممتلكاتي !!و للأمانه عطيت لنفسي الحق مو احبها و ابيها و
اعشقها صار لي اكثر من سنه اتمناها .. خلاص يحق لي و لو بقاموسي بس !
لين ذاك اليوم كانت بحاله مو طبيعيه .. تترنح !
يايه
شبه مفصخه و سكرانه .. شنو صار فيني بالضبط ؟ ما ادري بس من شفتها تخورها
و طالب امريكي طايح له تلمس فيها فار دمي .. ركضت لها و عطيتها كف !!
بلشت
تصارخ باسلوب شوارعي و بالانجليزي .. فشديتها من شعرها و يريتها للشارع و
انا مستغرب من نفسي شلون تجرأت و طقيتها و شكو تاخذني الحميه على وحده
مثلها كل الطلبه الكويتيين يعرفونها ..
اخذت
تاكسي .. و لأني أعرف وين ساكنه وصلتها للعماره الي اهي فيها و بالغصب
قالت لي باي دور و اي شقه و نص ساعه على ما تطلع المفاتيح .. كنت شايف
بافلام وايد السكران يعطونه قهوه .. و يحطونه تحت الدشو هذا الي سويته ..
بدت تبجي و تخربط ..
شنو شعوري وقتها ؟
حب و شفقه على غضب و حقد !!
كانت تسب ابوها ..
"
لو كنت ريال جان لميتني من الشوارع .. لو كنت ريال جان ما صار صلوح جنس يا
القــ ...قلت للعالم ان ولدك مات و طرشته فرنسا و قلت ان بنتك تزوجت
امريكي و استقرت هناك .. تستحي مني ؟ جان راقبت و حاسبت مو تحط النار يم
البانزين و تقول شلون شبت الحريجه .. عساها نار تاكلج يا يما .. نار تحرقك
و تحرق اسمك و ثروتك .. ونامت .. !
ابتلشت والله بس ما هان علي اهدها بالحمام جذي !
اول
شي كلينكس و مسحت كل السوائل اللزجه الي من خشمها ومن حلجها و بعدها
الالوان الي ساحت على ويها من البجي .. شلتها .. شلت حبيبتي حطيت على
سريرها .. فصخت جواتيها و دلاغاتها ..
بغيت
امشي بس شكلها على السرير خلاني اهون عن الروحه .. و قربت منها و اقتربت
اكثر و اكثر .. كانت الفرصه جدامي و اقدر استغلها عدل .. و استغليتها و لا
تسألوني ليش و لا شلون ما مسكت نفسي ؟
خذيت المشط و مشطت شعرها !!
سكرت
الليت و الباب و طلعت افكر بعلاقتي مع هالتعبانه و نمت و انا انطر باجر يا
ترى شراج يصير تشتكي علي ؟ لو انها تأشر بس بناء على قوانينها اقل شي
آكلها 10 سنوات سجن مع الاشغال الشاقه !

» قصة حب واقعيه حزينه
» قصص حب واقعيه إضافة رد
» قصه حب مأساويه - قصص حب واقعيه
» قصص واقعيه لليلة الدخله
» اروع واجمل قصة حب واقعيه ..!